Mewah ku ka Annah Rais.

            Semester ripas, anak sikuraa Program Linguistik sewa ndi  adi nembit Bidayuh adii ka pi’in peras nggaa mewah ka remin betang dii Annah Rais. Gunaa ki’eh mewah ka Annah Rais inǔh yǔn ningga kerejaa pingendai baraa Bidayuh dii remin betang. Ki’eh biranyut pukor mai sesan so Unimas pakai bas ka Annah Rais.

Eran adii ka Annah Rais ruwaai bisakap emai agi koner dengap. Ki’eh mewah ka pi’in peras diyǔ yǔn nyepor dawǔ ka remin betang.  Dii pi’in peras, agi ndi kedee juwaa begǔ masam pingumaan Bidayuh sutoo-i tubi di’eh trumbo nggaa rega murah. Agi baraa dingaan mamuh dii pi’in peras ka agi baraa dingaan adi manggang siyok. Ripas ka pi’in peras, ki’eh adii ka remin betang dii Annah Rais dǔh joo so pi’in peras.

            Aku ruwaai gagaa kan ndǔg dii remin betang emai ba’uh ndi mewah dii giti.  Remin betang epung-epung emai ki’eh mewah anduu mingguu. Tepat  tenju remin betang babǔ pakai bisawuh tegap tajaa pakai buru.  Ki’eh ningga kerejaa pingendai berang anduu baraa Bidayuh dii giti. Batan asar  agi babǔǔ dii remin betang Annah Rais inǔh Panggah. Agi gǔh dinge tikurok dii beratus sewa babǔǔ dog jagaa bisig ndǔg madin. Dii tepat sindung remin betang agi gambar mural remus. Aku gagaa ningga agi babǔǔ anak anyaa rarat birubii pemain embaa sutoo-i keris keyuh. Aku ngerah anak anyaa ka bidundaan pasar remin betang nggaa kerejaa pingendai ngeraa. Pak, ku dǔh dapǔd bidundaan begǔ emai re meri ka sikuraa.

            Begǔ pinyipuan sitǔkǔd mewah ka pi’in peras nggaa remin betang. Aku mewah adii re mendǔg dinge ka remin betang pak dǔh-i anduu mingguu. Aku re’an natǔng nggaa dǔǔm begǔ dinge batan baraa Bidayuh.